Kamjenc (SN/MkWj). Nawrót serbskeho zapósłanca Lěwicy Hajka Kozela do Sakskeho krajneho sejma dźěło Budyskeho wokrjesneho zwjazka Lěwicy widźomnje wolóža. Na to je zapósłanča strony w krajnym sejmje Marion Junge pokazała. Kaž wona na dźensnišej nowinarskej rozmołwje w Kamjencu zdobom připowědźi, chcyła so jutře z nim zetkać, zo byštaj sej nadawki we wólbnym wokrjesu rozdźěliłoj. Kozel bě so w nowembru do sejma nawróćił, po tym zo bě jedna ze zapósłancow Lěwicy hinašu funkciju přewzała.
Swoje lětuše dźěłowe ćežišća widźi Marion Junge předewšěm na polu financowanja ludowych uniwersitow a w lěpšim wobdźělenju wobydlerjow na politiskich procesach. Tak chce frakcija Lěwicy knježacu koaliciju CDU a SPD pohonjeć, zo masowe peticije, kotrež peticiski wuběrk krajneho sejma docpěwaja, přichodnje zjawnje wobjednawa. Hakle njedawno bě so zhromadnje z tamnymi čłonami peticiskeho wuběrka sakskeho sejma w zwjazkowym sejmje wobhoniła, kak tam w tymle prašenju postupuja.
