Wo serbskej prapremjerje młodźinskeho dźiwadła w NSLdź

Budyšin (SN/CoR). Nowa inscenacija młodźinskeho dźiwadła Serbskeho gymnazija w NSLDź je wčera přihladowarjow w Budyskim Dźiwadle na hrodźe wulce zahoriła. Bě to zdobom serbska prapremjera hry „Crux abo Zbóžnik pod łožom“ Hanki Jenčec, kotraž měješe 2010 w Hannoveru němskorěčnu premjeru. Spisowaćelka a bywša elewka NSLDź běše tehdy z mjenowanym kruchom zhromadne wubědźowanje Delnjosakskeje lotoweje załožby a Młodeho jewišća Hannover za młodych pisacych dobyła. Nastork bě jej tehdy artikl w Serbskich Nowinach wo wobškodźenym křižu při dróze. W hrě njejsu cuzy swjaty křiž wonječesćeli, ale młodostni ze wsy. Brizantna tema tuž, kotruž pjeć lět po němskej premjerje Budyske dźiwadło skónčnje tež Serbam přicpěwa. „Sće dźensa zmužiće to zdokonjeli, wo čimž hižo dołho rozmyslujemy“, rjekny zastupjerka intendanta za serbske dźiwadło Madleńka Šołćic po premjerje młodym hrajerjam.