Rozdźělne politiske a geografiske zakłady a wuměnjenja w federalistiskich systemach mějachu a maja wšelake wuskutki na wuwiće serbšćiny w Němskej a katalanšćiny w Španiskej.

Budyšin (SN/JK). Rjad lětušich wědomostnych přednoškow je so wčera popołdnju w Budyskim Serbskim instituće zahajił. Doktorand politiskich wědomosćow na uniwersiće w kanadiskim Québec Jean-Rémi Carbonneau přednošowaše wo teritorialnej awtonomiji a legitimaciji mjenšinowych rěčow w federalistiskich systemach. Carbonneau je fachowc za mjeńšinopolitiske prašenja we wšelakich zapadnych krajach. Na přikładźe Łužicy a katalanskich kónčin w Španiskej wón pokaza, kak wšelako so federalne struktury krajow na wobćežny proces připóznaća mjeńšinopolitiskich žadanjow wuskutkuja.

W Serbskim instituće bě Carbonneau loni praktikum wukonjał a zaběraše so w tym času z geografiskimi kaž tež politiskimi wosebitosćemi wuwića serbskeje rěče. Tež lětsa budźe zaso štwórć lěta w instituće slědźić. Wuslědki swojeho dźěła předstaji na wosebitym zarjadowanju potom nazymu.