Budyšin (SN/at). Zajimawu a k hłubšemu rozmyslowanju pohonjacu diskusiju wo politiskej kulturje dožiwichu wobdźělnicy zetkanja zwjazkoweho dźěłoweho zjednoćenstwa Lěwicy Etniske mjeńšiny sobotu w Budyšinje. Wuměnjachu so wo zjawach rasizma w kraju a wo tym, kak su mjeńšiny po­trjechene. Při tym spytachu, so wobšěrnišo tež z neonacistiskimi a tak zdobom rasistiskimi tendencami přećiwo Serbam rozestajeć. Jako wuraz noweje kwality mjenowachu zrudźace połoženje w Budyšinje. Stolica Serbow dožiwja a dźeń wjace prawicarsce wu­směrjenych demonstracijow, kotrež přećiwne zarjadowanja wuwabjeja. Zdawa so, zo su mnozy wobydle­rjo na to hižo zwučeni. „Po Brechće je najwjetši strach strach zwučenosće“, warnowaše Sieghard Kozel. Domowina so lědma k tomu wupraja, byrnjež na tamnej stronje prócowanja na dobro přichadźacych ćěkancow podpěrała.