Zawodna rada Vattenfalla přilubjenja Zwjazka wita
Grodk (dpa/K/SN). Strukturna změna na polu energije je wobzamknjena, čehoždla je tohorunja wěste, zo su tež kónčiny na wuchodźe kraja wot toho chětro potrjechene. K něčemu zahubnemu pak njesmě dóńć. Zwjazkowe knježerstwo chce po kóncu wudobywanja brunicy dalše wuwiće Łužicy spěchować. To je zwjazkowa ministerka za wobswět Barbara Hendricks (SPD) łužiskim hórnikam wčera w Grodku přilubiła. Stać ma so to na te wašnje, zo wobdźěli so Zwjazk na wutworjenju alternatiwnych dźěłowych městnow na polu energije. Dźěłowe městna móhli nastać na přikład w sektoru składowanja wobnowjomnych energijow. Kelko, to njeje Hendricks mjenowała. Tuchwilu dźěła we łužiskim brunicowym hórnistwje hišće něhdźe 8 000 ludźi. Šwedski energijowy koncern Vattenfall zaměstnja jich w štyrjoch wuhlowych jamach kaž tež we wjacorych wuhlowych milinarnjach.
