Minister wčera w Budyšinje: „Sakska ma lěta dołho problem z rasizmom“
Budyšin (UM/SN/at). Ze swojej wizitu wčera nawječor w Budyšinje je zastupowacy ministerski prezident a statny minister za hospodarstwo a dźěło Martin Dulig (SPD) pokazał, zo njemóžeš po palnym nadpadźe na planowany dom ćěkancow Husarenhof dale činić, kaž njeby so ničo stało. Wuraznje chwali wón Budyske iniciatiwy, kotrež so wo ćěkancow staraja. Wěcnu debatu wo ćěkancach „njemóžeš na krajne knježerstwo abo komuny wotwalić, tež nic na hospodarstwo. Naležnosć mamy wšitcy hromadźe zmištrować“, rjekny Dulig před wupalenym bywšim hotelom „Husarenhof“.
Tam informowaše jeho zastupjer Budyskeje wobhospodarjenskeje towaršnosće GZ, mějićela imobilije, zo bě wona wobstražowana a zo zničene twarjenje, hnydom po tym zo je zawěsćernja škodu zarunała, na dom ćěkancow dale wutwarja. Budyski wyši měšćanosta Alexander Ahrens (njestronjan) signalizowaše spěšne wobdźěłanje trěbneje twarskeje próstwy. Zastupjer mějićela zdobom wobkrući, zo njeběchu płomjenja jedyn dźěl twarjenja zničili.
