Industrija chcyła nastupajo ćěkancow wjac podpěry politikarjow

Wien/Berlin (dpa/K/SN). Kak sej z problemom lětstotka – migraciskej krizu – na čłowjesce spokojace wašnje radu dać, prawdźepodobnje nichtó prawje njewě. Dźensa spyta Awstriska hromadźe z krajemi zapadneho Balkana naležnosć do horšće dóstać. We Wienje wuhotuje wona strategiske schadźowanje, na kotrymž wobdźěleja so wonkowni a nutřkowni ministrojo 18 krajow, mjez druhim z Albaniskeje, Bosniskeje-Hercegowiny, Chorwatskeje, Makedonskeje, Serbiskeje a Słowjenskeje. Wobdźělnicy wobjednawaja temy kaž hraničny management, bój přećiwo pašowanju a ekstremizmej kaž tež zhromadne dźěło z třećimi statami. Grjekska njeje přeprošena, čehoždla wona na zeńdźenje kritisce zhladuje. Boji so, zo dóńdźe we Wienje k rozsudam, kotrež móhli wuskutkować, zo so w Grjekskej ćěkancy nahromadźa.