Budyšin (SN/CoR). „Serbšćina je prěnja cuza rěč, kotruž na swojim putnikowanju nadeńdu. To mje překwapja, wšako sym z pólšćinu ličił“, praji Shahin Tivay Sadatolhosseini. Po 1 000 kilometrach bě wón dwaj dnjej w Budyšinje hósć Mühlec swójby. Nětko pak ćehnje rodźeneho Iranjana z Aachena dźensa dale na wuchod. 22. decembra je so wón z Rhönskim kolesom na puć do Teherana podał, „do směra swěcy“. Wjele lět bě studowany designer a choreograf jako artist z Rhönskim kolesom skutkował, nětko chce wulki sportowy nastroj do Irana přinjesć – pěši. Najwažniše pak jemu je ludźi zeznać. „Kóžda nabožina ma swoje putniske městno, kaž stej to Santiago de Compostela abo Mekka. A častodosć dźe wo to, sebje samoho wotkryć – ja chcu druheho wotkryć, a to na indiwidualnej čarje.“ Impozantne koleso jemu při tym pomha. Husto ludźo jeho narěča a jemu tež nócne lěhwo poskićeja. Cyłe lěto wón za 7 000 kilometrow planuje. Europska stolica Wrócław budźe přichodna wulka stacija, potom chce so na balkansku čaru ćěkancow podać – hinak wokoło.