Sakski premier Tilich w Praze był

Drježdźany/Praha (dpa/K/SN). Sakski ministerski prezident Stanisław Tilich (CDU) je w swojim lětušim zastojnstwje jako prezident Zwjazkoweje rady wonkopolitisce jara aktiwny. Po njedawnym wopyće Waršawy a Parisa přebywaše wón wčera w čěskej stolicy Praze, zo by tam ze zamołwitymi ludźimi wo aktualnych prašenjach rěčał. Po zetkanju z premierom Bohuslavom Sobotku Tilich rjekny, zo chcetej Sakska a Čěska w boju přećiwo prawicarskej šćuwańcy w socialnych syćach skutkownišo hromadźe dźěłać. Njesmě k tomu dochadźeć, zo ekstremisća, kotřiž prawo a zakonje ranja, „statnym wyšnosćam“ wutwochnu. To by jedyn z wažnych zaměrow zhromadneho dźěła był. Swoju funkciju wuži Tilich tež k tomu, ze Sobotku porěčeć wo migraciskej krizy. „Ličba ćěkancow njemóže dale přiběrać, wona dyrbi so nahladnje pomjeńšić“, sej 56lětny sakski politikar žadaše. Zdobom warnowaše wón před nastaćom „Europskeje unije à la carte“. Praha wobara so runja dalšim čłonskim krajam Visegrádskeje štyrki zasakle trajnej kwoće přijimanja ćěkancow do krajow EU.