Njebjelčicy (AW/SN). Ze załoženjom towarstwa „Smy z.t.“ wčera wječor w Njebjelčicach dósta iniciatiwna skupina Serbski sejm nošerja, kotryž ma spěchować a zaručić prawniske a financne zawěsćenje. Wot přitomnych dźewjeć załoženskich čłonow zdźěłany a jednohłósnje přiwzaty statut towarstwa staji sej mjez druhim nadawk, skrućić serbsku rěč a kulturu, wobydlerski a interkulturny angažement kaž tež wutworić demokratisce legitimowane ludowe zastupnistwo Serbow. Towarstwo ma iniciatiwje prawnisce poboku być, za nju financne dary přijimać a darowanske kwitowanki wupisać. Iniciatiwna skupina dźěła wobsahowje dale na docpěću swojeho zaměra.

Jednohłósnje wuzwolichu dr. Měrćina Wałdu za předsydu towarstwa, Hanza Wylema-Kella a Tomaša Čornaka za městopředsydow, prawiznika Helmuta Schwarza za pokładnika a Gunnara Schneidera za zapisowarja. Z čłonom móže so kóžda tež juristiska wosoba zjawneho abo priwatneho prawa stać, rěka w statuće no- weho serbskeho towarstwa.