Wot toho časa, zo je balkanska čara za­wrjena, dochadźa k nahromadźenjam ćěkancow wosebje w Grjekskej. Awstriska dale na tym wobstawa, zo njesměli ćěkancy „awtomatisce dale pućować.

Athen/Brüssel (dpa/K/SN). Njerědko stawaja so při tym mjez nimi dramatiske podawki, hdyž wo to najtrěbniše k zežiwenju přisamom wojuja. „Najhórje ćerpja ći najmjeńši“, skorži pomocny škit UNO za dźěći UNICEF. Europska unija nałoži wurjadnje 700 milionow eurow, zo móhła migrantow w tajkich lěhwach lěpje zastarać. Prezident Europskeje rady Donald Tusk, přeswědčacy so na městnje wo połoženju, napomni staty Schengenskeho ruma, migrantow konsekwentnje wotpokazać, kotřiž wuměnjenjam za připućowanje njewotpowěduja. Druhdy su „bohužel razniše naprawy trěbne, zo by Schengenski rum škitany był“, wón na wopyće Makedonskeje zwurazni.