Rada za serbske naležnosće Sakskeje je so dźensa w Drježdźanach ze zastupjerjemi iniciatiwneje skupiny za legitimowane demokratiske zastupnistwo Serbow – Serbski sejm zetkała.
Drježdźany (SN/JaW). Sakska serbska rada zetka so dźensa pod nawodom swojeje předsydki, zapósłanče zwjazkoweho sejma Marje Michałkoweje (CDU), w sakskej stolicy ze zastupnikami iniciatiwneje skupiny Serbski sejm. „Smy z rěčnikom iniciatiwy dr. Měrćinom Wałdu a dalšimaj čłonomaj Benediktom Dyrlichom a Tomašom Čornakom wotewrjenje wo naležnosći zastupnistwa Serbow rěčeli“, rjekny Marja Michałkowa na naprašowanje. Wobě stronje zwěsćištej, zo su dalše rozmołwy trěbne. Na konkretnosće dalšeho postupowanja abo rozmołwne terminy pak so njedojednachu. Zetkanje z iniciatiwnikami bu nastorčene, dokelž bě k njedorozumjenjam nastupajo přilubjenu podpěru iniciatiwje ze stron sakskeje statneje ministerki za wědomosć a wuměłstwo dr. Evy-Marije Stange (SPD) dóšło. Kaž Michałkowa praji, je ministerka na naprašowanje rady potwjerdźiła, do nutřkoserbskich naležnosćow so njetykać.