Brüssel/Athen (dpa/K/SN). Po měsacach chaotiskeje politiki w migraciskej krizy je wot dźensnišeho wjerška šefow statow a knježerstwow krajow Europskeje unije wočakować, zo nawal ćěkancow zadźerža. Z diplomatiskich kruhow bě zhonić, zo balkansku čaru zawru. EU chcyła dale docpěć, zo Turkowska wotpokazanych próstwarjow wo azyl wróćo wozmje. Ankara ma za to tři miliardy eurow dóstać. Pjenjezy dyrbjeli so za polěpšenje połoženja wjace hač dweju milionow Syričanow nałožić, kotřiž běchu před wobydlerskej wójnu do Turkowskeje ćekli.
Šefojo krajow EU zetkaja so w běhu štwórć lěta znowa tež z turkowskim ministerskim prezidentom Ahmetom Davutoğluwom. Němska kanclerka Angela Merkel (CDU) bě so hižo wčera z nižozemskim premierom Markom Rutte rozmołwjała. Při tym dźěše wo konsekwency z migraciskeje krizy.
