„Lesć“ je nowa hudźbna drama , za kotruž běše dramaturgowka Serbskeho ludoweho ansambla Jěwa-Marja Čornakec libreto spisała a tamniši šefdirigent Dieter Kempe hudźbu podał. Musical měješe minjeny pjatk wječor w Bórkowach delnjoserbsko-němsku premjeru. Na slědowacymaj wječoromaj bu inscenacija pod hołym njebjom wospjetowana.

Bórkowy (CRM/SN). Runje kaž loni prěni dźěl znowapowědanych powěsćow wo serbskim kralu Přebysławje, błótowskim holiču Linje, wódnym mužu Nykusu, jeho dźowce Wodźe, hadźacej kralownje Kralowce, jeje synu Wužu a druhich powěsćowych postawach je tež lětuše pokročowanje pozitiwny wothłós žnjało. Pod režiju Stefana Haufy hrajachu, spěwachu a rejwachu chór a balet SLA kaž tež hosćo, z kotrychž měješe Tomaš Cyž z Budyskeho NSLDź hłownu rólu krala Přebysława a Dorota Farkašec rólu holiča Liny. Njehraješe pak so jenož na městnje před Bismarckowej wěžu. Cyły impozantny historiski twar bu sobu zapřijaty a k tomu mjeńšej jewišći kaž tež wulki teren z nahladnym wobstatkom štomow. Póćmje so kuzłapołne zaćišće přez dobru techniku hišće zesylnichu.