Dalša inscenacija přihladowarjow do Čorneho Chołmca wabi

Čorny Chołmc (JK/SN). Pjaty raz bě so wčera ležownosć Čornochołmčanskeho Krabatoweho młyna na wulke jewišćo z wobkuzłacej kulisu přeměniła. Tam zahajichu z premjernym předstajenjom „Krabat a kolebka wěčnosće“ 5. Krabatowe swjedźenske hry.

Štóž je tam w Čornym Chołmcu minjene lěta směł dožiwić jedne z předstajenjow, kotrež su wuslědk prócowanjow towarstwa Krabatowy młyn, wjesnych towarstwow, powołanskich a lajskich wuměłcow kaž tež profesionalneho wuměłskeho­ nawoda Petera Siebecki z Drježdźan, tón wě, kak wulki je wukon, kotryž tam mjeztym pokazuja.