Budyšin (SN/MiR). Sakski ministerski prezident Stanisław Tilich (CDU) nadźiješe so čiłeje diskusije wo demokratiji w Sakskej. To bě poprawna tema połdrahodźinskeje idejoweje konferency młodźiny dźensa dopołdnja w Budyskim Melanchthonowym gymnaziju we wobłuku 1. tydźenjow demokratije w sprjewinym měsće. Na zarjadowanje běchu so młodostni z tamnišeho kaž tež Schilleroweho a Serbskeho gymnazija a dalši ze wšelakich wyšich šulow přihotowali. Šulscy nawodźa runje tak kaž Budyski financny měšćanosta dr. Robert Böhmer (njestronjan) wočakowachu tuž mnohostronsku diskusiju. Třo zastupjerjo Schilleroweho a Melanchthonoweho gymnazija pak koncentrowachu so w swojich prašenjach na jeničku temu – šulstwo. Při tym dótkachu so temow kaž wabjenja za wučerski dorost, narunanja wupadnjenych wučbnych hodźin, wyšeho płaćenja wučerjow kaž tež toho, zo měli so sakscy wučerjo zarjadnicy stać. Tilich skedźbni młodostnych na to, zo njeleži ćežišćo w tym, měć po ličbje dosć wučerjow, ale w tym, za kotre předmjety su wukubłani.