Choćebuz (SN/at). Plany braniborskeho knježerstwa za reformu wokrjesnych teritorijow na juhu kraja Němski dźěłarniski zwjazk (DGB) wotpokazuje. Wotpohladany južnobraniborski wokrjes, kotremuž měli dotalne wokrjesy Sprjewja-Nysa, Łobjo-Halštrow, Hornje Błóta- Łužica kaž tež bjezwokrjesne město Choćebuz přisłušeć, „je přewulki“, rjekny regionalna jednaćelka DGB južna Braniborska/Łužica Marion Schleier powěsćerni dpa.

DGB žada sej w tymle nastupanju za južnu Braniborsku, zo so wobstejacej planowanskej regionaj wobkedźbujetej. „Wočakujemy, zo so pozicije regionalneho planowanja zapřijeja. To njeje so dotal stało“, wuzběhny Dieter Judith, předsyda měšćanskeho zwjazka DGB Choćebuz w rozmołwje z našim wječornikom. Hižo we wobłuku regionalnych konferencow w přihotach wokrjesneje reformy bě DGB po słowach Juditha na tónle njedostatk skedźbnił, bjez wuspěcha.