Po wčerawšim krawnym nadpadźe na Berlinske dohodowne wiki
Berlin (dpa/SN/MkWj). Muž, kiž bě wčera wječor při terorowym nadpadźe na dohodowne wiki na Berlinskim Breitscheidowym naměsće z nakładnym awtom wotpohladnje dwanaće ludźi morił a 48 zdźěla ćežko zranił, je wobrónjeny a dale ćěka. Tole je Berlinska policija dźensa zdźěliła. Wčera wječor zajaty 23lětny Pakistanjan njebě za wodźidłom nakładneho awta sedźał. Policija je wuprajenja podhladneho přepruwowała a zwěsćiła, zo su wěrne, kaž dźensa informowaše. „Smy wopačneho zajeli“, rěkaše připołdnju ze stron policije. Do toho běchu zdźělili, zo je zajaty Pakistanjan njeskutka nuznje podhladny. Swědk bě jeho po krawnym nadpadźe přesćěhał a policiji přepodał. Muž bě loni přez Passau jako ćěkanc do Němskeje přišoł a bydleše wot toho časa w domje za požadarjow azyla na něhdyšim lětanišću Tempelhof Berlin. Policiji bě wón wšelakich „snadnych deliktow“ dla znaty. Njeskutk wón prěje.
