Budyšin (SN). Sakski minister za nutřkowne naležnosće Markus Ulbig (CDU) je tele dny Budyskemu wyšemu měšćanosće Alexanderej Ahrensej (njestronjan) spěchowanske srědki 896 074 eurow přewostajił.­ Srědki pochadźeja z noweho spěchowanskeho programa Europskeje unije „Dołhodobne socialne měšćanske wuwiće do lěta 2020“. Z pjenjezami móža socialne předewzaća w Budyskej měšćanskej štwórći Strowotna studnja podpěrać. Dobropis přepodachu w rumnosćach towarstwa Swětłownja-Majak. Markus­ Ulbig wuzběhny: „Budyšin móže ze spěchowanskimi srědkami tójšto inowatiwnych projektow zwoprawdźić. Wone skruća socialnu infrastrukturu a zwyša kubłanske a dźěłowe šansy na městnje. Inwesticije su w prěnim rjedźe na dobro dźěći a młodostnych.“

Město Budyšin chce předewšěm socialne połoženje w Strowotnej studni polěpšić. K planowanym předewzaćam słuša mjez druhim projekt towarstwa Majak „Cyłe žiwjenje wuknyć“. Z nim chcedźa w prašenju kubłanja, komunikacije a při rozrisanju konfliktow pomhać. Za to poskića swójbam dźěłarnički.