Budyšin (SN/at). Wětřik, dešć a miłe temperatury město zmjerzka a sněha běchu wonkowne znamjenja swjatych dnjow. To pak njeje křesćanow we Łužicy wottrašiło, w bohatej ličbje Bože słužby abo hodowne nutrnosće swjećić. We hłowje mějachu často hišće krawny atentat na adwentne wiki na Berlinskim Breitscheidowym naměsće. Strach ludźi před terorom tematizowachu duchowni tež w hodownym prědowanju.
Drježdźansko-Mišnjanski biskop Heinrich Timmerevers rečeše w tym zwisku wo „njepředstajomnych“ podawkach. „Přeco hižo smy so toho bojeli; smy so nadźijeli, zo njebudźemy wot toho potrjecheni. A tola je so to nětk stało.“
Biskop Ewangelsko-lutherskeje krajneje cyrkwje Sakskeje dr. Carsten Rentzing ma Berlinski atentat za nadpad na hodowne poselstwo. Tohodla je najlěpša wotmołwa ta, „zo so wokoło tohole poselstwa hromadźimy“, wuzběhny wón na bohosłužbje pod hołym njebjom 23. decembra před cyrkwju Našeje knjenje w Drježdźanach.