Do Altenberga sněhakować jěć
Drježdźany. Jutře a njedźelu pojědu prěni króć w tutej sezonje zymskosportowe ćahi sakskeje měšćanskeje železnicy w nadawku wobchadneho zwjazka Hornje Łobjo z Drježdźan do Altenberga a Geisinga. Z hłowneho dwórnišća wotjědźetej ćahaj we 8.05 a 10.05 hodź., z Altenberga zaso wróćo do sakskeje stolicy w 15.18 a 17.18 hodź.
Nowolětne přijeće
Wojerecy. Třeći króć wuhotuje Swobodne wolerske zjednoćenstwo StadtZukunft Wojerecy jutře wot 9 do 13 hodź. w škleńčanym dworje Łužiskeho centera za wšitkich zajimowanych wobydlerjow města a wokoliny nowolětne přijeće. Při wólnej rozmołwje chcedźa sej na nowe lěto připić.
Hodowny oratorij zaklinči
Chróstawa. Jutře, 7. januara, w 17 hodź. zaklinči w Chróstawskej cyrkwi hodowny oratorij Johanna Sebastiana Bacha. Pod nawodom Lucasa Pohle móža zajimcy dožiwić Drježdźanski ansambl Capella Sagittariana, cyrkwinski chór, kurendu kaž solistow Dorotheju Wagner (sopran), Saruh Keller (echosopran), Brittu Schwarz (alt), Sebastiana Reima (tenor) a Clemensa Heidricha (bas). Zastup płaći dźesać eurow, potuńšene štyri eura.