Přihotuja 2. Budyske dny demokratije

Budyšin (CRM/SN). Kak chcemy w našim měsće w dobrej zhromadnosći a nic porno sebi žiwi być, tele prašenje je wčera wječor w Budyskim ewangelskim wosadnym domje (KiK) wjace hač dwaceći zajimcow rozjimało, přihotujo tak 2. Budyske dny demokratije w přichodnym měsacu. „Hladajo na to, zo mějachmy k lońšim 1. dnjam demokratije wulki poskitk zdźěla dosć naročnych zarjadowanjow na programje, z kotrymiž pak smy jenož mało ludźi docpěli, spytamy wobydlerstwo nětko hinak narěčeć“, praji Anne-Marie Russew z towarstwa Budyšin wostanje pisany. Dźe wo to, komunalnych politikarjow a ludnosć dale a bóle zapřijimać, podšmórny farar ewangelsko-lutherskeje wosady swj. Pětra Christian Tiede.