Budyšin (SN/at). Dwurěčne módre awtodróhowe tafle podłu A 4 w Sakskej kaž tež podłu A 13 a A 15 w Braniborskej móhli pućowacych na tu bydlacu mjeńšinu skedźbnjeć. Hižo bywši předsyda Domowiny Jan Nuk bě so swój čas bjez wuspěcha wo to prócował. Nětko je so łužiska zapósłanča zwjazkoweho sejma Caren Lay (Lěwica) zwjazkowe knježerstwo za tym prašała, hač ma wone za móžne, awtodróhowe tafle w serbskim sydlenskim rumje Sakskeje a Braniborskeje dwurěčnje němsce a serbsce popisać, podobnje němsko-čěskemu wuhotowanju w pomjeznej kónčinje k Čěskej.