Dowólbna rozmołwa z Michaelom Kretschmerom, naměstnikom frakcije CDU w zwjazkowym sejmje a generalnym sekretarom CDU w Sakskej

Mjez Mužakowom a Oybinom je Michael Kretschmer po puću, zo by za politiku CDU a za sebje samoho wabił. 42lětny je wot lěta 2002 zapósłanc Němskeho zwjazkoweho sejma, a nětko we wólbnym wokrjesu 157 (Zhorjelc) znowa kandiduje. Constanze Knappowa je z nim rěčała.

By-li čłowjek diskusijam w socialnych medijach wěrił, potom ćěri knježerstwowa koalicija Němsku do bjezdna – z krizu ćěkancow, dale powjetšacym so rozdźělom mjez chudymi a bohatymi, z dieselowym a jejacym skandalom a dalšimi „twarnišćemi“. Wy pak wulku politiku přiwšěm hišće sytu nimaće?

M. Kretschmer: Wirtuelny rum socialnych medijow w mnohim nastupanju ničo z realnym žiwjenjom činić nima. W Europje płaći Němska jako sylny kraj a spušćomny partner. Tež w ćežkich časach bě naše knježerstwo jednanjakmane. Tohodla je bjezdźěłnosć w našim kraju na jara niskim niwowje, a hospodarstwo a dochody z dawkow rostu. Ale tež w přichodźe budźe wjele nadawkow, a na tym chcu sobu skutkować.