Budyšin (SN/at). Akciski tydźeń přećiwo zabyću „Zhromadnje město sam“ na Budyskich Žitnych wikach dopomina na wukročenja loni w septembrje mjez młodymi požadarjemi azyla a tudyšimi prawicarjemi. Lěwicarska młodźina je hromadźe z Jusosami, Budyskim muzejom a zwjazkarstwom Budyšin wostanje pisany rjad zarjadowanjow přihotowała, kotryž zahaji so zawčerawšim na „plaće“ z rozmołwu mjez tudyšimi młodostnymi, kak woni wo Europje mysla.
„Tež po jednym lěće njeje zadźerženje jednotliwych policistow w konteksće rasistiskich wuprajenjow zabyte, kotrež dyrbjachu młodźi požadarjo azyla poćerpjeć“, rjekny Annalena Schmidt ze zwjazkarstwa wčera na kromje mjezykulturneho bifeja. Tam dachu sej ludźo na přikład syriske plincy zesłodźeć. Korzymske towarstwo TanzArt pokaza wurězki ze swojeje indiskeje rejwanskeje přehladki.