W sakskim wobswětowym ministerstwje pruwuja próstwu z Budyšina
Drježdźany/Budyšin (SN/at). Powěsće wo wospjetnym škodowanju plahowarjam wowcow přez wjelki Róžeńčanskeje črjódy njejsu tež minjene dny popušćili.
Wot Budyskeho krajneho rady Michaela Hariga (CDU) zapodatu próstwu, wjelka z tamnišeje črjódy třělić směć, přisłušne sakske ministerstwo za wobswět a ratarstwo (SMUL) pruwuje. Kaž nowinski rěčnik ministerstwa Jörg Förster na naprašowanje Serbskich Nowin zdźěli, ma SMUL nětko posudźować, hač wot Budyskeho krajnoradneho zarjada podate přičiny, přizwolić wuwzaćnu dowolnosć, zakonskim narokam za třělenje wjelka wotpowěduja. „Jasne je, zo wokrjes dowolnosć wudźěli“, rjekny Jörg Förster. Přidatne konsultacije njejsu předpisane. W datym padźe pak móža eksterni fachowcy maćiznu sobu posudźować. Dokelž pruwowanje traje, njemóže nowinski rěčnik tuchwilu rjec, kak spěšnje ministerstwo naležnosći přihłosuje. „Rozsudne při tym je, hač je dalša podpěra eksternych ludźi trěbna.“