Kito Lorenc je njeboh. Po krótkej ćežkej chorosći zemrě wón 24. septembra 2017 w Budyšinje. Tyšna powěsć wo smjerći wusahowaceho literata wulku syłu přećelow a česćowarjow we Łužicy a daloko za jeje mjezami trapi. Zhubimy z Kitom Lorencom njewšědnje płódneho, wurjadneho basnika, wudawaćela a přełožerja. Literarny swět budźe chudši bjez jeho magiskich, přemyslowacych, druhdy styskniwych, často žortnych a pryzlojtych basnjow, bjez jeho akribiskeho zestajerskeho dźěła na polu literatury a jeho mnoholičbnych přebasnjenjow ze swětowych literaturow. Čas žiwjenja přewodźeše duch poezije jeho wobšěrne tworjenje w hornjoserbskej, delnjoserbskej a němskej rěči.