Katka Pöpelec je w aktualnej hrajnej dobje Němsko-Serbskeho ludoweho dźiwadła jedna z dweju elewkow činohrajneho studija Budyskeho NSLDź.

„Sym hižo w Chróšćanskej šulerskej skupinje dźiwadźeliła. Tohodla njebě za mnje pozdźišo na Budyskim Serbskim gymnaziju scyła prašenje, hač so na castingu młodźinskeho dźiwadła wobdźělu“, rozjimuje Katka Pöpelec swój puć na jewišćo. Dožiwjenja prěnjeho wotrězka jako hrajerka z wjerškomaj předstajenjow improwizacije „Wokomik prošu!“ a krucha „Crux abo Zbóžnik pod łožom“ Hanki Jenčec běštej jej runje tak pohon, so činohrajnemu studiju a tak powołanskemu jewišću přizamknyć, kaž poručenja přećelow a bywšich elewow.

Mjeztym je wona hižo 13 króć titulnu – a jeničku – rólu w hrě „Čmjeła Hana chce pomhać“ hrała. „Tele předstajenja su mi wulke wjeselo. Hra sama žada sej fleksibelnosć, wšako su nazhonjenja dźěći ze serbšćinu, kotrež sej ju wobhladuja, rozdźělne. Zwjetša pak na mjezwočach spóznawam, hač mje rozumja abo nic. Potom dyrbju reagować. Ćežko je, knje­ži-li w publikumje njeměr, to pak dotal přehusto­ njemějachmy“, Katka rozłožuje.