Mnozy Kitej Lorencej poslednje „božemje“ prajili

Bukecy (SN/MiR). Wjacore sta žarowacych, mjez nimi wulki dźěl Serbow, přewodźachu Kita Lorenca sobotu připoł- dnju k jeho poslednjemu wotpočinkej na Bukečanskim kěrchowje. Při najrjeńšim babylěćnym wjedrje su sławneho serbskeho lyrikarja, dramatikarja a přełožerja, kiž bě 24. septembra po zajeću božeje ručki wudychał, na kěrchowje při muri pohrjebnišća w přewšo dostojnej, luboznej a na wšěch přitomnych skutkowacej miłej atmosferje pochowali. Mjez mnohimi žarowacymi swójby běchu na pochowanje přišli předsyda Domowiny Dawid Statnik, nawodźa wjacorych serbskich institucijow, předsydźa serbskich towarstwow, nawoda instituta za slawistiku Drježdźanskeje techniskeje uniwersity dr. Christian Prunitsch a basnica Elke Erb.