Jako naslědnika na čole sakskeje CDU Michael Kretschmer ze Zhorjelca namjetowany

Drježdźany (dpa/SN/at/JaW). To běše dyr do politiskeje krajiny wčera nawječor w Sakskej statnej kencliji na krótkodobnje zawołanej nowinarskej konferency. Ministerski prezident Stanisław Tilich (CDU) připowědźi, na stronskim zjězdźe sakskeje CDU 9. decembra znowa za krajneho předsydu njekandidować a na to tež zastojnstwo ministerskeho prezidenta wotedać. „Namjetuju swojej stronje, Michaela Kretschmera za noweho krajneho předsydu wuzwolić. Budu w decembru zastojnstwo ministerskeho prezidenta złožić. Přeju sej, zo naša CDU-frakcija a SPD tež do tohole zastojnstwa Michaela Kretschmera wuzwolitej“, rjekny Tilich wčera před žurnalistami. Z tymle postupowanjom je wón konsekwency sćahnył z debakla při wólbach zwjazkoweho sejma 24. septembra, hdźež sta so w swobodnym staće dotal dominowaca CDU jeno z druhej najsylnišej politiskej mocu po AfD. Tilichej pak je rjadowany přechod wažny, tohodla njeje hnydom wotstupił.