Juro Mětšk jako prěni komponist z Mytom Ćišinskeho wuznamjenjeny

Pančicy-Kukow (SN/JaW). Sakski ministerski prezident Stanisław Tilich (CDU) je sobotu na Čerwjenej žuli klóštra Marijineje hwězdy w Pančicach-Kukowje serbskeho hudźbutwórca Jura Mětška z Budyšina z Mytom Ćišinskeho wuznamjenił. Spěchowanske myto k Mytu Ćišinskeho spožči Tilich serbskej spisowaćelce Lubinje Hajduk-Veljkovićowej z Lipska.

W přitomnosći čłonow kuratorija Myta Ćišinskeho, předsydki rady Załožby za serbski lud Susann Šenkec, załožboweho direktora Jana Budarja a zastupjerjow z politiki, mjez druhim zapósłanče Němskeho zwjazkoweho sejma Marje Michałkoweje a zapósłancow Sakskeho krajneho sejma Marka Šimana, Alojsa Mikławška (wšitcy třo CDU) a Hajka Kozela (Lěwica), wupřa wón počesćenymaj zbožo a nadal wuspěch. Při witanju namołwješe předsydka załožboweje rady Šenkec: „Dźensniše spožčenje Myta Ćišinskeho ma tuž być měr a ćěr za waju dotalne a přichodne skutkowanje.“