Budyšin/Berlin (SN/JaW). W aktualnych jednanjach CDU, CSU, FDP a Zelenych w Berlinje wo tak mjenowanu jamaisku koaliciju maja tež Serbja rólu hrać. Wo tym dorěčachu so wjacori serbscy politikarjo, mjez nimi bywša zapósłanča Němskeho zwjazkoweho sejma Marja Michałkowa, zapósłancaj Sakskeho krajneho sejma Marko Šiman a Alojs Mikławšk kaž tež sakski ministerski prezident Stanisław Tilich (wšitcy CDU).

Tilich je jako jenički serbski politikar do jednanjow aktiwnje zapřehnjeny. Tuž chcył wón tam tež naležnosće Serbow načeć, praji wón našemu wječornikej na kromje spožčenja Myta Ćišinskeho minjenu sobotu w Pančicach-Kukowje. „Smy runje wo tym rěčeli, kak a na kotre wašnje do tohole procesa zapřimnjemy“, sakski premier rozłoži, „mam za wažne naležnosće Serbow zapřijeć. Tuchwilu pak hišće tak daloko njeje. Rozmołwy a jednanja politiskich stron hišće na spočatku. Tuchwilu njewěmy, do kotreho směra so jednanja wuwiwaja a tak tež nic, hdy budźe přihódny wokomik, so tejele nalež­nosće přimać.“