Serbski ludowy ansambl z mnohimi nowymi sobudźěłaćerjemi

Budyšin (SN/CoR). Wo prašenju, štó budźe přichodny intendant abo intendantka Serbskeho ludoweho ansambla, móžeš spekulować. Fakt na tamnym boku wšak je, zo je so na personalnej runinje w SLA lětsa hižo tójšto změniło. Tak maja wot spočatka lěta dohromady 18 nowych sobudźěłaćerjow. Hladajo na formalnych 89,75 dźěłowych městnow resp. 97 realnje w SLA sobuskutkowacych su tak w běhu lět něhdźe pjećinu cyłeho personala wuměnili. Změna potrjechi – wothladajo wot hišće wustejaceho wuměłskeho nawodnistwa – wšitke wobłuki.