27. festiwal wuchodoeuropskeho filma zahajili
Choćebuz (HA/SN). Wčera wječor su w Choćebuskim statnym dźiwadle 27. festiwal wuchodoeuropskeho filma oficialnje zahajili. Hač do njedźele móža sej zajimcy wjac hač 200 filmow ze 46 krajow wobhladać. Serbska tematika je lětsa znowa sylnje zastupjena.
Hižo póndźelu běchu prěnje filmy z hoberskeho poskitka pokazali. W najstaršim kinje Choćebuza Weltspiegel wuhotowachu 15. króć „Choćebusku filmowu pokazku“. Lajscy filmowcy z Hornjeje a Delnjeje Łužicy zapodachu k tomu swoje přinoški w najwšelakorišich žanrach. Po třoch hodźinach je jury, kotrejž přisłušeše tohorunja serbski kulturny wědomostnik Daniel Kubik, wozjewiła třoch dobyćerjow filmoweho wubědźowanja. Hłowne myto zdoby sej produkcija „Pjeć mjeńšin“, pokazowaca młode holcy, kak ze starosćemi a problemami wšědneho dnja wobchadźeja.