Podstupim (SN/bn). Na 25. zjawnym posedźenju Rady za serbske naležnosće Braniborskeje wčera na Podstupimskim měšćanskim hrodźe su čłonojo gremija kaž tež zastupjerjo krajneho knježerstwa a Domowiny cyłkownje sydom dnjowych dypkow wobjednali. Po protokolarnej kontroli sćěhowaštej rozprawje społnomócnjeneje za naležnosće Serbow w Braniborskej Ulriki Gutheil, kotruž zastu­powaše Měto Nowak, a předsydy serbskeje rady Torstena Maka.

W kontrowersnym dypku dorěčachu so radźićeljo k zwrěšćenej reformje noworjadowanja wokrjesnych přestrjenjow. Najwažnišo radźe je, zo změje přichodnje kóždy wokrjes serbskeho sydlenskeho ruma tež serbskeho zastupjerja.

Čłonka předsydstwa Domowiny Judit Šołćina wabješe we wobłuku wuradźowanja znowa za wobydlersku iniciatiwu Minority SafePack. „Zaměr wospjetneho wuzběhowanja tejele akcije hłownje je, zjawnosć a wosebje zapósłancow hišće raz wo njej informować. Serbska rada je jako cyłk iniciatiwu hižo podpisała, a to přejemy sej tež wot našich parlamentownikow a wobydlerjow“, Mak podšmórny.