Budyšin (SN/MiR). Situacija hospodarskeho wuwića w Budyšinje a w Hornim kraju Budyskeho wokrjesa so přiwótřa. Na jednym boku pobrachuja fachowe mocy, na druhim sej młodźi ludźo dale w druhich zwjazkowych krajach powołansku perspektiwu pytaja. Tež na polu infrastrukturneho wuwića pokazuja so brachi. Zwěsćenja to, kotrež dadźa zapósłanca sakskeho krajneho sejma Marka Šimana (CDU) wo tym rozmyslować, kak so tomu wobarać. „Naše hospodarske předewzaća maja so nětko wo spěchowanske srědki starać, kotrež Europska unija hišće hač do lěta 2020 k dispoziciji staji, a to wosebje we wobłuku slědźenje a wuwiwanje“, rjekny wón dźensa na nowinarskej konferency w Budyšinje. Zdobom pokazuje wón na trěbne wuwiće infrastruktury, kotrež by sprjewine město zaso na polu hospodarskeho spěchowanja sylniło. Jedyn krok je, Stieberowu dróhu wot křižowanišća Stieberowa/Jordanowa hač na křižowanišćo Stieberowa/Lubijska wutwarić. Planowanje je hižo wotzamknjene. Šiman slubi sej lěpše nawjazanje Budyšina a přez to wuwiće dźěłowych městnow, tež industrielnych.