Budyšin (SN/CoR). Diskusija, kak ma so projektowe dźěło na bazy najlěpje podpěrać, hač su managerojo w jednotliwych towarstwach za to trěbni abo skerje centralne městno jako partner za wšitkich, zaběra towarstwa, Domowinu, Załožbu za serbski lud a jeje radu nanajpozdźišo wot lěta 2014. Tehdy dźě su někotrym towarstwam financowanje managerow raznje skrótšili. Přičina bě nachwilny hospodarski etat z milionom eurow mjenje. Šmórnjenje bě wótru kritiku wuwabiło, wosebje w Zwjazku serbskich wuměłcow. Nětko je Domowina – po rozsudźe załožboweje rady z 30. nowembra – dźěłowe městno projektoweho managera wupisać móhła. Na najprjedy jedne lěto wobmjezowane městno ma „zesylnjenju projektoweho dźěła serbskich towarstwow w Hornjej a Delnjej Łužicy“ słužić. Je problem z tym rozrisany? Z wida jednaćela Domowiny Marka Kowarja nic. „Nimam to za doskónčne rozrisanje. Dźěłowe městno samo na sebi je tež jenož projektowe městno, dokelž je wobmjezowane. Je to praktiski zazběh, prawy puć namakać, a hodźi so na kóždy pad rozšěrić“, praji Kowar našemu wječornikej.