Budyšin (SN/MiR). Němsko-Serbske ludowe dźiwadło Budyšin zhladuje na přewšo wuspěšne lěto 2017. Ličba wopytowarjow je wospjet rozrostła. W lěće 2016 bě 152 500 zajimcow na předstajenja přišło, loni 2 581 wjace. NSLDź bě na 961 předstajenjow přeprosyło, lěto do toho na 895. Loni witachu hrajerjo publikum we wobłuku inscenacijow na 19 premjerow, klankodźiwadźelnicy mějachu jich dźewjeć. Šěsć króć dožiwichu lubowarjo serbskorěčneho dźiwadła w tymle wobłukomaj nowy poskitk.