ST Lubuš – ST Marijina hwězda 1:5 (0:3)

Zestawa hosći: O. Schmidt – Czapik, Rab, K. Pakoßnick, R. Hawš, Peschmann, Kuring, O. Hawš (55. Eldor), P. Schmidt, A. Škoda, J. Pakoßnick (66. Čornak)

Najebać wupad wjacorych chowancow trenarja Erwina Kleinmanna su koparjo Sportoweho towarstwa Marijina hwězda w Lubušu 5:1 dobyli. Na zmjerznjenym hrajnišću woni partiju wot wšeho spočatka postajachu. Hižo po 25 sekundach měješe Oskar Hawš prěnju móžnosć. Po přihrawce Paul Schmidta pak dźěše zběhnjeny bul snadnje wyše wrotow. W 9. min. poradźi so 0:1. Falko Pesch­mann bě přećiwniski škit přelesćił, a Jakob Pakoßnick trjechi. Po tym nadźěłachu sej klóšterscy koparjo wjacore jara dobre móžnosće, žanu pak njemóžachu přetworić (12., 16., 28.), byrnjež přećiwnika jasnje pod kontrolu měli. Tež Antonius Škoda so po dołhim času zranjenja dla bjez problema do cyłka integrowaše. Z pasom Falkej Peschmannej postara so wón wo přihrawku za 0:2. Wrota pak třěli Paul Schmidt (37.). Z wuběrnej bulowej stafetu wot swójskeho škita nasta 0:3 (42.). Do lisćiny třělcow zapisa so znowa Pakoßnick.