Podstupim/Berlin (SN/JaW). Braniborske knježerstwo je z towarstwom za delnjoněmčinu spočatk tydźenja dojednanje wo zaměrnišim spěchowanju rěče podpisało. To zdźěli wčera frakcija Lěwicy w krajnym sejmje.

Kaž ze zdźělenki wuchadźa, so Lěwica w Braniborskej kaž tež frakcija strony w Němskim zwjazkowym sejmje hižo wjacore lěta wo lěpše wobłukowe wuměnjenja k zachowanju a hajenju delnjoněmčiny zasadźa. Politikarjo maja póndźelu podpisane dojednanje za dalšu wažnu kročel w prócowanjach wo zdźerženje rěče. „Wěmy, zo dźe wo wjac hač jenož wo to, nałožki hajić. Dźe wo nawrót před lětstotkami tu nałožowaneje rěče. Braniborska je dopokazała, zo zamóže za to tójšto zdokonjeć“, rjekny zapósłanc Lěwicy w zwjazkowym sejmje Kirsten Tackmann. „Zhromadnje z narodnymi mjeńšinami je braniborske knježerstwo wot lěta 2009 wuměnjenja za regionalne a mjeńšinowe rěče zasadnje polěpšiło. Dojednanje dokumentuje politisku wolu, ludźi předewšěm při nałožowanju a daledawanju rěče podpěrać“, doda zapósłanc Lěwicy w Braniborskim krajnym sejmje Thomas Domres.