Wojerecy (JoS/SN). Přijomne miłe wjedro je minjeny kónc tydźenja 24. jutrownym wikam we Wojerowskej Łužiskej hali wulku ličbu wopytowarjow wobradźiło. K tomu přinošował je po wšěm zdaću tež nakupowanski kónc tydźenja we Łužiskim centeru w susodstwje.
70 wustajerjow z Łužicy, Drježdźanskeho a Berlinskeho regiona prezentowaše debjene jutrowne jejka a jutrowne rjemjeslniske wuměłstwo. Woblubowanu měšeńcu wudospołnichu wjacore kulturne ćělesa ze swojim programom. Sobotu zawjeselištej hosći mjez druhim Brětnjanska serbska rejwanska skupina a Delnjoserbski dźěćacy a młodźinski ansambl. Njedźelu pokaza Smjerdźečanska rejwanska skupina wurězki ze swojeho repertoira, a spěwytwórc Bernd Pittkunings předstaji program z dźěćimi.
Stajnje wjele ludźi tłóčeše so wokoło debjerjow serbskich jutrownych jejkow. Najmłódša z nich bě dwanaćelětna Lisa-Marie Stephan, najstarši pak 83lětny Werner Zaroba, wobaj z Wojerec. Dalši běchu z Choćebuza, Grodka, Běłeje Wody, Złeho Komorowa a wot druhdźe do Wojerec přijěli.