21. raz dojědźechu sej šulerjo a wučerjo Serbskeho gymnazija Budyšin (SGB) do čě­skich Jánskich Láznjow, zo bychu so tam w sportowej družinje alpinske sněhakowanje wukmanili.

W stawiznach SGB započa so sněhakowar­ske wukubłanje w februaru 1995 w Malej Úpje w čěskich Kyrkonošach. Tři lěta pozdźišo běchu nowy domicil Jánské Lázně blisko Čorneje hory našli. Lětsa w měrcu dojědźe sej 59 šulerjow a šěsć wučerjow do znateho kwartěra pensije „Protěž“. Wjedro bě tónraz měnjate, ale na pistach knježachu idealne wuměnjenja.