Filmowy festiwal Nysa z čěskim ćežišćom a ze serbskej premjeru
Wulke Hendrichecy (SN/bn). Lětuši Filmowy festiwal Nysa (NFF) zahaji so dźensa za tydźeń w Žitawje. Tak mjenowany warm-up pod hołym njebjom wotměje so dźensa w Zhorjelcu. Cyłkownje pokazuje swjedźeń hłownje zarjadowace Wulkohendrichečanske towarstwo Kunstbauernkino 132 filmow na dohromady 20 hrajnišćach třikrajoweho róžka.
W Hornjej Łužicy předstajeja paski w Budyšinje, Lubiju, Herbikecach (Mittelherwigsdorf), Zhorjelcu, Žitawje a Wulkich Hendrichecach (Großhennersdorf). Nimo toho budu twórby w čěskim Varnsdorfje, Rumburku, Hrádeku nad Nisou a Liberecu kaž tež w pólskej Sieniawce a Zgorzelecu widźeć. Po zwučenym wašnju wobdźěli so dźewjeć hrajnych a runje telko dokumentarnych filmow kaž tež sydom krótkofilmow na wubědźowanju wo „Nysowske ryby“. Šěsć produkcijow je z kandidatom za specialne myto Filmoweho zwjazka Sakskeje, publikumowej myće wuzwola wopytowarjo ze wšěch přinoškow. Čestne myto spožča lětsa němskemu režiserej Christianej Petzoldej, komuž zdobom retrospektiwu wěnuja.