Serbsce a němsce hrajo a spěwajo přinošuja mnozy k poradźenju Krabatowych swjedźenskich hrow

Dobry poměr mjez powołanskimi a lajskimi dźiwadźelnikami je tež w Čornym Chołmcu na Krabatowych swjedźenskich hrach kóžde lěto njeparujomny zakład wuspěšnych předstajenjow. To pokazuje so wosebje lětsa, jako zahajichu tam kónc junija nowy cyklus z hrami wokoło Krabata a wyška Šadowica. Po tym zo běchu šěsć wšelakich stawiznow z Krabatoweho žiwjenja kaž tež bój mjez Krabatom a Čornym młynkom předstajili (wot lěta 2012), je so wuměłske mustwo wokoło Siebeckec mandźelskeju za nowe wobsahi rozsudźiło. Naročny a powabliwy scenarij za to spisać měješe Michael Kuhn, režiju wjesć pak kaž dotal Ulrich Schwarz. Teksty dialogow kaž tohorunja wulkeho dźěla spěwow tworił je Michael Kuhn, rodźeny Wojerowčan, znaty dźiwadźelnik a spisar mnohich jewišćowych tekstow, mjez druhim za cyklus „Baba Jaga“, kotryž běše w Drježdźanach wuspěšny. Wón twori poměrnje wuspěšnje teksty a skripty za telewizijne a rozhłosowe sćelaki po cyłej Němskej.