Barley: Alarmowacy signal

póndźela, 23. julija 2018
artikl hódnoćić
(0 )

Berlin (dpa/SN). Zwjazkowa ministerka za justicu Katarina Barley ma wumjetowanja wotstupjeneho hrajerja němskeje narodneje koparskeje wubranki Mesuta Özila rasizma dla za signal hłuboko sahaceho towaršnostneho problema. „Je alarmowace znamjo, hdyž nječuje so němski kopar kaž Mesut Özil w swojim kraju rasizma dla akceptowany a wot koparskeho zwjazka hižo reprezentowany“, politikarka SPD wčera wječor twitterowaše.

Z dotal njesłyšanymi wumjetowanjemi rasizma dla přećiwo šefej koparskeho zwjazka DFB Reinhardej Grindelej a druhim funkcionaram DFB bě Özil wčera němske narodne koparske mustwo wopušćił. We wjacdźělnym stejišću w Gelsenkirchenje rodźeny kopar z turkowskimi korjenjemi pisaše: „We wočach Grindela a jeho pomocnikow sym Němc, hdyž dobudźemy, ale imigrant, hdyž přěhrajemy.“ Özil sej žada: „Ludźo z rasistiskim diskriminowacym pozadkom njesměli dlěje w najwjetšim koparskim zwjazku swěta dźěłać směć, kotryž ma telko hrajerjow ze swójbow wšelakeho pochada. Njejsym dlěje winik jeho njekompetentnosće a njekmanosće“, Özil hladajo na Grindela piše.

wozjewjene w: Politika
Prošu přizjewće so, chceće-li komentar podać

nawěšk

nowostki LND