Wo načolnej kandidaturje za krajny sejm rozsudźa baza sakskeje Lěwicy
Wojerecy (SN/at). Načolnu kandidaturu sakskeje Lěwicy k wólbam Sakskeho krajneho sejma 1. septembra 2019 postaja stronjenjo we wobłuku sobustawskeho rozsuda. Hromadźe z tym wotměwaja sobustawske naprašowanje nastupajo wobsahowe ćežišća za wólbny program. To su delegaća stronskeho zjězda Lěwicy Sakskeje sobotu we Wojerecach wobzamknyli. Tak je strona jenička, „kotraž sej zwěri čłonstwo so prašeć, dźe-li wo to, ćežišća za přichodne wólby krajneho sejma postajić“, podšmórny krajna předsydka Antje Feiks w swojej rozprawje.