Ministerka w Kamjenicy kwětki połožiła

pjatk, 31. awgusta 2018
artikl hódnoćić
(0 )

Kamjenica (dpa/SN). Po namócnej smjerći 35lětneho Kamjeničana a přećiwo wukrajnikam měrjacych so namócnosćach je so dźensa swójbna ministerka Franziska Giffey (SPD) jako prěnja zastupnica zwjazkoweho knježerstwa do Kamjenicy podała. Tam je rano kwětki na městnje połožiła, hdźež bu 35lětny minjenu njedźelu na kromje měšćanskeho swjedźenja zakłóty.

Wot toho dnja bě w Kamjenicy wospjet k demonstracijam a namócnosćam dóšło. Jutře planujetej AfD a wukrajnikam spřećiwjace so hibanje Pegida dalšu manifestaciju.

Wčera bě so něhdźe 900 ludźi po namołwje prawicarskopopulistiskeho hi­banja Pro Chemnitz k protestnemu zarjadowanju zhromadźiło. Demonstracija składnostnje wobydlerskeho dialoga sakskeho ministerskeho prezidenta Michaela Kretschmera (CDU) wosta měrna. Policija bě z 1 200 zastojnikami prezentna.

Sakske justicne ministerstwo mjeztym zdźěla, zo je wosobu wuslědźiło, kotraž bě wukaz zajeća přećiwo morjenja podhladnemu Irakčanej w interneće wozjewiła. Sobudźěłaćerja justicy, wón dźěła w jastwje jako stražnik, su nablaku suspendowali.

wozjewjene w: Kraj a swět
Prošu přizjewće so, chceće-li komentar podać

Serbska debata

nowostki LND