Trenujetej šěsć króć wob tydźeń

wutora, 11. septembera 2018
artikl hódnoćić
(0 )
Felicitas Bobkec z ponyjom Diddlom (nalěwo) a jeje sotra Franciska ze Sweetyjom wojujetej přichodny kónc tydźenja w Hórkach wo titul sakskeje mišterki.  Foto: Betina Wenderothowa Felicitas Bobkec z ponyjom Diddlom (nalěwo) a jeje sotra Franciska ze Sweetyjom wojujetej přichodny kónc tydźenja w Hórkach wo titul sakskeje mišterki. Foto: Betina Wenderothowa

Wonej chodźitej do samsneje rjadownje, matej samsne swójbne mjeno, swjećitej zhromadnje narodniny a jej zwjazuje samsny hobby – přezpólne ­jěchanje. Přichodny kónc tydźenja ­wojujetej dwanaćelětnej Bobkec dwójnikaj Franciska a Felicitas ze swojimaj ponyjomaj Sweetijom a Diddlom w Hórkach wo titul najlěpšeje sakskeje jěcharki w starobnej klasy U16 w přezpólnym jěchanju. Betina Wenderothowa je so z Miłočankomaj rozmołwjała.

Prěni raz we wobłuku jěchanskeho turněra konjaceho sportoweho towarstwa Při Klóšterskej wodźe wotměja so kónc toho tydźenja sakske mišterstwa juniorow z ponyjemi. Kak stej so na wubědźowanje přihotowałoj?

Franciska: Trenujemoj ze swojimi konjemi a ponyjemi šěsć króć wob tydźeń, potajkim wšědnje nimo póndźele. To mamoj mjenujcy hudźbnu šulu. Naš ­nan z namaj dresuru a skakanje přez zadźěwki zwučuje. Minjene tydźenje smój tež direktnje w Hórkach na čarje zwučowałoj.

Nětko póńdźe runje před domjacym publikumom za waju wo titul sakskeje mišterki. Je to wosebite wužadanje?

Felicitas: Poprawom so wjeselimoj, zo přińdu tež šulscy towaršojo a přećeljo přihladować. Tak móža so z naju sportom lěpje zeznajomić, wšako je přezpólne jěchanje cyle wosebita disciplina w konjacym sporće. Na tamnej stronje dyrbiš so doma ­wosebje koncentrować, zo njeby ­zadźěwki ­přelochko wzał, dokelž sej mysliš, zo sy wšitko hižo raz zwučował. Runje potom so wosebje spěšnje tež raz zmylki stanu.

Kotre discipliny dyrbitej ze swojimaj ponyjomaj zmištrować?

Franciska: Zo bychu najlěpšeho młodeho jěcharja po cyłej Sakskej zwěsćili, njepruwuja sudnicy jeničce zamóžnosće při jěchanju samym, ale potom slěduje hišće teoretiski dźěl z prašenjemi kołowokoło konja. Nimo toho maš swojeho ponyja sudnikam předstajić. Tam sej wobhladaja, hač je tón strowy a w prawej kondiciji.

Matej samsne abo rozdźělne sylnosće?

Felicitas: Z tymi sylnosćemi je to tajka wěc. Moja sotra jěcha rady dresuru a je dobra w teoretiskim dźělu. Mi skerje skakanje leži. A wonka při přezpólnym ­jěchanju mamy wšitke štyri wjeselo, ­ponyjej a mój. Na kóncu je naju hesło: „Najlěpša dobudźe!“

To płaći wězo tež za wšěch tamnych jěcharjow wašeho jěchanskeho towarstwa. Štó so wšitko wobdźěli a što na přihladowarjow nimo młodźinskich mišterstwow hišće čaka?

Franciska: Lětsa su pruwowanja wot lochkeje klasy E hač do poměrnje ćežkeje klasy L wupisane, a to w dresurje, přezpólnym jěchanju a skakanju. Mjez druhim wobdźěla so naš nan Pětr Bobka, Křesćan Zahrodnik, Hana Brězanec a dalši z našeho towarstwa. Nowe je, zo budźe lětsa najwjace pruwowanjow w přezpólnym jěchanju njedźelu dopoł­dnja, nic kaž dotal hižo sobotu. Skakanje w sta­dionje a dresuru móža sej zajimcy sobotu wot wosmich wobhladać. Njedźelu čakatej na hosći nimo napjateho jěchanskeho sporta tež swjatočne počesćenje nowych sakskich mištrow a tradicionalne wubědźowanje zapřahow. A wězo smy tež na dźěći myslili, kotrež móža ­so na wjele překwapjenkow wjeselić. Wjace wo jěchanskim turněrje přichodny kónc tydźenja, časowy wotběh a nadrobniše informacije zhoniće pod www.psv-amklosterwasser.de.

Wutrobny dźak!

wozjewjene w: Rozmołwa
Prošu přizjewće so, chceće-li komentar podać

nawěšk

SERBSKE NOWINY podpěruja:

Novi Sad – kulturna stolica Europy

nowostki LND