Iniciatiwa za Serbski sejm chutnu fazu wólbnych přihotow zahajiła
Njebjelčicy (JK/SN). Wupada cyle tak, zo wotměja so wólby Serbskeho sejma kaž planowane 3. nowembra. To bě jedyn z markantnych rozsudow sobotneje dźěłarnički iniciatiwneje skupiny Serbski sejm w Njebjelčanskej „Bjesadźe“. Kandidaća a iniciatorojo běchu hač do wječora wo swojim dźěle, ale wosebje wo terminje wólbow a pječa dalšim trěbnym času, wolerjow mobilizować, wuradźowali.
Wobdźělnicy so prócowachu wuwědomić sej zmysł, wobsah a narok dźěła w Serbskim sejmje. Dźěše na přikład wo to, z přećiwneju pozicijow konsens docpěć. Poradźowar Njebjelčanskeje gmejny Johannes Heimrath moderěrowaše dwě dźěłarničce, při čimž skedźbni na trěbne wuchadźišća, jednohłósnje rozsudźeć, a pokaza na přikładach, kak hodźa so diskusije wjesć, mysle rjadować a tak wuspěch w sejmje zaručić. „Wažne je, z kotreje strony naležnosć wobhladuješ. Njesměš pak ju při tym samu z wočow zhubić“, wón wuzběhny.