Politiske strony analyzuja wuslědk wólbow Krajneho sejma Bayerskeje
Berlin (dpa/SN). Po ćežkej poražce při wčerawšich wólbach Bayerskeho krajneho sejma steja CDU/CSU a SPD pod wulkim ćišćom, połoženje we wulkej koaliciji zaso změrować. Hladajo na wólby Hessenskeho krajneho sejma za dwaj tydźenjej su nawodźa politiskich stron dźensa wo konsekwencach z wólbneho wuslědka w Bayerskej wuradźowali a wosebje wo tym, kak móhli mjez wolerjemi zaso na nahladnosći přibyć. W CDU rěča – dotal hakle njezjawnje – wo róli zwjazkoweje kanclerki Angele Merkel (CDU). Jeje wotstup wšak sej dotal hišće nichtó zjawnje žadać njezwaži.
Po dotalnym kónčnym wólbnym wuslědku je CSU ze 37,2 procentomaj (2013: 47,7) swoju absolutnu wjetšinu přisadźiła a trjeba nětko koaliciskeho partnera. SPD spadnje z 9,7 procentami (20,6) – po wšej Němskej najšpatniši to wólbny wuslědk – na pjate městno w Bayerskej. Jedyn z dobyćerjow su Zeleni ze 17,5 procentami (8,6). Swobodni wolerjo zawěsćichu sej 11,6 procentow. AfD, kotraž je prěni króć nastupiła, ma 10,2 procentaj. FDP je so z 5,1 procentom runje hišće tak do krajneho sejma předrěła.